سونے رستے کا سفر ہے اپنا

سونے رستے کا سفر ہے اپنا

ہم ہیں اور راہ گزر ہے اپنا

اسی تقسیم پہ راضی ہوئے ہم

پھول ان کا ہے شرر ہے اپنا

یہ بھی کیا کم ہے کہ اس مقتل میں

آج تک جسم پہ سر ہے اپنا

روح سے روٹھ کے جینا آخر

معجزہ ہے کہ ہنر ہے اپنا

دور تک بے سر و سامانی ہے

اب ٹھکانہ ہے نہ گھر ہے اپنا

کتنی خوشیوں کا لہو ہے اس میں

یہ جو اک دیدۂ تر ہے اپنا

اسی خوش فہمی نے زندہ رکھا

وہ پرایا ہے مگر ہے اپنا

کون ہے کس سے یہ پوچھیں راہیؔ

ایک صحرا ہے کہ گھر ہے اپنا