sune-sune dar-o-rasan batlate hain

sūne-sūne dār-o-rasan batlāte haiñ

sach kahne se log bahut katrāte haiñ

aañsū ban jaate haiñ ġham kahlāte haiñ

vo jazbe jo dil hī meñ mar jaate haiñ

ye hai baat judā vo ham se kah na sake

varna ḳhvāb to gūñge ko bhī aate haiñ

jis kī jānib aañkh uThānā mushkil ho

ham us sachchā.ī par qalam uThāte haiñ

har farmā.ish ā.inda par Tāltā huuñ

bachche mujh se jhuuT bahut bulvāte haiñ

dil terī qurbat meñ bhī afsurda hai

kyā shāḳhoñ par bhī ġhunche kumhlāte haiñ

dīda-o-dil donoñ kyoñ ik saath bujhe

mehr-o-māh ikaTThe kab gahnāte haiñ

saa.e phal aur phūloñ ke badle 'nusrat'

sochiye ham ashjār ko kyā lauTāte haiñ

sune-sune dar-o-rasan batlate hain

sach kahne se log bahut katraate hain

aansu ban jate hain gham kahlate hain

wo jazbe jo dil hi mein mar jate hain

ye hai baat juda wo hum se kah na sake

warna KHwab to gunge ko bhi aate hain

jis ki jaanib aankh uThana mushkil ho

hum us sachchai par qalam uThate hain

har farmaish aainda par Talta hun

bachche mujh se jhuT bahut bulwate hain

dil teri qurbat mein bhi afsurda hai

kya shaKHon par bhi ghunche kumhlate hain

dida-o-dil donon kyon ek sath bujhe

mehr-o-mah ikaTThe kab gahnate hain

sae phal aur phulon ke badle 'nusrat'

sochiye hum ashjar ko kya lauTate hain