sune sune se falak par ek ghaTa banti hui

suune suune se falak par ik ghaTā bantī huī

dhīre dhīre us kī aamad kī fazā bantī huī

janm kā bas ek lamha aur ab ye zindagī

ik zarā sī baat baḌh kar mas.ala bantī huī

qaid sī lagne lagī hai mujh ko ye āvārgī

ab to āzādī bhī merī ik sazā bantī huī

terī dī har choT ik lazzat sī hai mere liye

ab ye lazzat dā.imī sā zā.iqa bantī huī

kar ga.ī hai kis qadar masrūf mujh ko dekhiye

merī sub.h-o-shām kā vo mashġhala bantī huī

haiñ sabhī TuuTe hue ye jaan paayā jab dukhī

merī ik TuuTī sadā sab kī sadā bantī huī

ai mire saa.e milā hai jab se tujh sā ham-safar

rāste kī har musībat rāstā bantī huī

tham chukī thī jab ki har halchal tirī yaad aa.ī phir

zindagī kī sat.h par ik bulbulā bantī huī

merī āñkheñ haiñ abhī bhī is tilismī qaid meñ

is kī vo dhundlī sī sūrat jā-ba-jā bantī huī

is jalan ke saath hī rahnā hai ab 'ātish' mujhe

jo mirī zid thī kabhī ab vo anā bantī huī

sune sune se falak par ek ghaTa banti hui

dhire dhire us ki aamad ki faza banti hui

janm ka bas ek lamha aur ab ye zindagi

ek zara si baat baDh kar masala banti hui

qaid si lagne lagi hai mujh ko ye aawargi

ab to aazadi bhi meri ek saza banti hui

teri di har choT ek lazzat si hai mere liye

ab ye lazzat daimi sa zaiqa banti hui

kar gai hai kis qadar masruf mujh ko dekhiye

meri subh-o-sham ka wo mashghala banti hui

hain sabhi TuTe hue ye jaan paya jab dukhi

meri ek TuTi sada sab ki sada banti hui

ai mere sae mila hai jab se tujh sa ham-safar

raste ki har musibat rasta banti hui

tham chuki thi jab ki har halchal teri yaad aai phir

zindagi ki sath par ek bulbula banti hui

meri aankhen hain abhi bhi is tilismi qaid mein

is ki wo dhundli si surat ja-ba-ja banti hui

is jalan ke sath hi rahna hai ab 'atish' mujhe

jo meri zid thi kabhi ab wo ana banti hui