سورج اگرچہ تجھ کو بتاتا نہیں ہوں میں

سورج اگرچہ تجھ کو بتاتا نہیں ہوں میں

دن میں بھی اب چراغ بجھاتا نہیں ہوں میں

آوارگان دشت کا کرتا ہوں احترام

نقش قدم کسی کے مٹاتا نہیں ہوں میں

لب پر مچلتے رہتے ہیں میرے کئی سوال

لیکن کوئی سوال اٹھاتا نہیں ہوں میں

آتا ہے رشک اس کو مری زندگی پہ بس

جس کو بھی اپنے درد سناتا نہیں ہوں میں

میں بے تکلفی کا بھی قائل تو ہوں مگر

دیوار احترام گراتا نہیں ہوں میں

رکھا ہوا ہے دل میں ترے غم کو اس طرح

اس میں کسی کا غم بھی ملاتا نہیں ہوں میں