suraj agarche tujhko batata nahin hun main

sūraj agarche tujh ko batātā nahīñ huuñ maiñ

din meñ bhī ab charāġh bujhātā nahīñ huuñ maiñ

āvārgān-e-dasht kā kartā huuñ ehtirām

naqsh-e-qadam kisī ke miTātā nahīñ huuñ maiñ

lab par machalte rahte haiñ mere ka.ī savāl

lekin koī savāl uThātā nahīñ huuñ maiñ

aatā hai rashk us ko mirī zindagī pe bas

jis ko bhī apne dard sunātā nahīñ huuñ maiñ

maiñ be-takallufī kā bhī qaa.il to huuñ magar

dīvār-e-ehtirām girātā nahīñ huuñ maiñ

rakkhā huā hai dil meñ tire ġham ko is tarah

is meñ kisī kā ġham bhī milātā nahīñ huuñ maiñ

suraj agarche tujh ko batata nahin hun main

din mein bhi ab charagh bujhata nahin hun main

aawargan-e-dasht ka karta hun ehtiram

naqsh-e-qadam kisi ke miTata nahin hun main

lab par machalte rahte hain mere kai sawal

lekin koi sawal uThata nahin hun main

aata hai rashk us ko meri zindagi pe bas

jis ko bhi apne dard sunata nahin hun main

main be-takallufi ka bhi qail to hun magar

diwar-e-ehtiram giraata nahin hun main

rakkha hua hai dil mein tere gham ko is tarah

is mein kisi ka gham bhi milata nahin hun main