suraj bhaDke to manzar shadab sulagte hain

sūraj bhaḌke to manzar shādāb sulagte haiñ

dhūpeñ jab bhī tez huī haiñ ḳhvāb sulagte haiñ

kab āñgan par vasl kā bādal chhā.egā jānāñ

sūkhe ho kar āñkhoñ ke tālāb sulagte haiñ

pyaar kī bārish hotī hai jab ḳhushk chaTānoñ par

dil dhartī par an-dekhe zahrāb sulagte haiñ

rātoñ ko jab yādoñ kī barfāb havā.eñ hoñ

to palkoñ par ashkoñ ke guhr-āb sulagte haiñ

jaag uThte haiñ so.e hue kirdār kahānī ke

raat ga.e jab jhīloñ par mahtāb sulagte haiñ

nafrat se ḳhud apnī aag meñ jaltī haiñ āñkheñ

pyaar se sab shaitānoñ ke alqāb sulagte haiñ

chāñd-nagar meñ yaad aatī hai ik dopahar 'kafīl'

ThanDe ThanDe mausam meñ a.asāb sulagte haiñ

suraj bhaDke to manzar shadab sulagte hain

dhupen jab bhi tez hui hain KHwab sulagte hain

kab aangan par wasl ka baadal chhaega jaanan

sukhe ho kar aankhon ke talab sulagte hain

pyar ki barish hoti hai jab KHushk chaTanon par

dil dharti par an-dekhe zahrab sulagte hain

raaton ko jab yaadon ki barfab hawaen hon

to palkon par ashkon ke guhr-ab sulagte hain

jag uThte hain soe hue kirdar kahani ke

raat gae jab jhilon par mahtab sulagte hain

nafrat se KHud apni aag mein jalti hain aankhen

pyar se sab shaitanon ke alqab sulagte hain

chand-nagar mein yaad aati hai ek dopahar 'kafil'

ThanDe ThanDe mausam mein aasab sulagte hain