suraj gaya to chand sitare nikal paDe

sūraj gayā to chāñd sitāre nikal paḌe

jin kī talāsh thī vo nazāre nikal paḌe

ai kārvān-e-qaum tirī ḳhair ho ki ham

lagtā hai rahzanoñ ke sahāre nikal paḌe

tūfān josh par thā safīna bhañvar meñ thā

ġharqāb ham hue to kināre nikal paḌe

thā jis kā ḳhauf ho ke rahā hādsa vahī

neze kisī ke siine hamāre nikal paḌe

pahle to mere haq meñ zabāñ us kī aag thī

jab aag tham ga.ī to sharāre nikal paḌe

jab se baḌhā hai bhaav siyāsat meñ zahr kā

le kar sapere naag piTāre nikal paḌe

thā ghar kā sā.ebān harā peḌ jab girā

taqsīm-sāz hāthoñ se aare nikal paḌe

kaisī ḳhatā huī ki sar-e-mai-kada the ham

sab kah uThe 'qamar' bhī hamāre nikal paḌe

suraj gaya to chand sitare nikal paDe

jin ki talash thi wo nazare nikal paDe

ai karwan-e-qaum teri KHair ho ki hum

lagta hai rahzanon ke sahaare nikal paDe

tufan josh par tha safina bhanwar mein tha

gharqab hum hue to kinare nikal paDe

tha jis ka KHauf ho ke raha hadsa wahi

neze kisi ke sine hamare nikal paDe

pahle to mere haq mein zaban us ki aag thi

jab aag tham gai to sharare nikal paDe

jab se baDha hai bhaw siyasat mein zahr ka

le kar sapere nag piTare nikal paDe

tha ghar ka saeban hara peD jab gira

taqsim-saz hathon se aare nikal paDe

kaisi KHata hui ki sar-e-mai-kada the hum

sab kah uThe 'qamar' bhi hamare nikal paDe