suraj hai naya chand naya tare nae hain

sūraj hai nayā chāñd nayā taare na.e haiñ

ye kyā pas-e-duniyā hai jo ham dekh rahe haiñ

mausam to ka.ī aa.e magar ḳhvāb hamāre

sūkhe hue pattoñ kī tarah girte rahe haiñ

har lamha koī iiñT ukhaḌ jaatī hai jis kī

ham log usī dīvār ke saa.e meñ khaḌe haiñ

ḳhud apne hī saa.e ne hameñ nīchā dikhāyā

ham sochte the ham sabhī sāyoñ se baḌe haiñ

vo ek bhañvar sunte haiñ dilkash hai ġhazab kā

haiñ kitne safīne jo vahāñ Duub chuke haiñ

rañgīn dūkānoñ meñ saje haiñ jo khilaune

andar se agar dekho to sab TuuTe hue haiñ

'betāb' numāyāñ nahīñ kuchh aise magar haañ

in lambī qatāroñ meñ kahīñ ham bhī khaḌe haiñ

suraj hai naya chand naya tare nae hain

ye kya pas-e-duniya hai jo hum dekh rahe hain

mausam to kai aae magar KHwab hamare

sukhe hue patton ki tarah girte rahe hain

har lamha koi inT ukhaD jati hai jis ki

hum log usi diwar ke sae mein khaDe hain

KHud apne hi sae ne hamein nicha dikhaya

hum sochte the hum sabhi sayon se baDe hain

wo ek bhanwar sunte hain dilkash hai ghazab ka

hain kitne safine jo wahan Dub chuke hain

rangin dukanon mein saje hain jo khilaune

andar se agar dekho to sab TuTe hue hain

'betab' numayan nahin kuchh aise magar han

in lambi qataron mein kahin hum bhi khaDe hain