سورج کا شہر شب کے اندھیرے میں دھنس گیا

سورج کا شہر شب کے اندھیرے میں دھنس گیا

تنہائیوں کا جسم بھی دلدل میں پھنس گیا

اب راستوں پہ سنگ کی بارش کے دن گئے

دیوانہ جب سے شہر کا جنگل میں بس گیا

تنہائی کی سڑک پہ کڑی دھوپ دیکھ کر

اک بار تیرے قرب کا بادل برس گیا

اب روشنی کے لب پہ خموشی محیط ہے

زہریلا ناگ جیسے تبسم کو ڈس گیا

تیرا خیال شب کے دریچے سے کود کر

پی کر ہماری سوچ کے ہونٹوں کا رس گیا

کاغذ کے آئنہ بھی یہاں ہیں دھواں دھواں

شاید ہمارے چہرے کا چہرہ جھلس گیا