suraj ka shahr shab ke andhere mein dhans gaya

sūraj kā shahr shab ke añdhere meñ dhañs gayā

tanhā.iyoñ kā jism bhī daldal meñ phañs gayā

ab rāstoñ pe sang kī bārish ke din ga.e

dīvāna jab se shahr kā jangal meñ bas gayā

tanhā.ī kī saḌak pe kaḌī dhuup dekh kar

ik baar tere qurb kā bādal baras gayā

ab raushnī ke lab pe ḳhamoshī muhīt hai

zahrīlā naag jaise tabassum ko Das gayā

terā ḳhayāl shab ke darīche se kuud kar

pī kar hamārī soch ke hoñToñ kā ras gayā

kāġhaz ke aa.ine bhī yahāñ haiñ dhuāñ-dhuāñ

shāyad hamāre chehre kā chehra jhulas gayā

suraj ka shahr shab ke andhere mein dhans gaya

tanhaiyon ka jism bhi daldal mein phans gaya

ab raston pe sang ki barish ke din gae

diwana jab se shahr ka jangal mein bas gaya

tanhai ki saDak pe kaDi dhup dekh kar

ek bar tere qurb ka baadal baras gaya

ab raushni ke lab pe KHamoshi muhit hai

zahrila nag jaise tabassum ko Das gaya

tera KHayal shab ke dariche se kud kar

pi kar hamari soch ke honTon ka ras gaya

kaghaz ke aaine bhi yahan hain dhuan-dhuan

shayad hamare chehre ka chehra jhulas gaya