suraj ke sath dub ke ghamnak ho gae

sūraj ke saath duub ke ġhamnāk ho ga.e

shab-zād lamhe din se bhī saffāk ho ga.e

pattoñ ko zard kar ga.ī patjhaḌ kī ek mauj

ġhunche shajar se Tuut ke ḳhāshāk ho ga.e

rahte haiñ duur duur shikārī ke jaal se

jangal ke ab parind bhī chālāk ho ga.e

nashtar sā kaam kar ga.iiñ phūloñ kī pattiyāñ

nannhī sī titliyoñ ke bhī par chaak ho ga.e

jin ko samundaroñ ke bhañvar se lagāo thā

maujoñ se khel khel ke tairāk ho ga.e

kho aa.e kis anā meñ vo apnī tajalliyāñ

ā.īne sang kyā hue bas ḳhaak ho ga.e

kartī rahī haiñ āñdhiyāñ jin ke charāg gul

jugnū vo shab ke aur bhī bebāk ho ga.e

kyā phir idhar se zard havā kā guzar huā

ḳhushbū ke silsiloñ se chaman paak ho ga.e

kirdār be-kashish hai numā.ish kī dhuup meñ

'arshad' nazar meñ qīmtī poshāk ho ga.e

suraj ke sath dub ke ghamnak ho gae

shab-zad lamhe din se bhi saffak ho gae

patton ko zard kar gai patjhaD ki ek mauj

ghunche shajar se Tut ke KHashak ho gae

rahte hain dur dur shikari ke jal se

jangal ke ab parind bhi chaalak ho gae

nashtar sa kaam kar gain phulon ki pattiyan

nannhi si titliyon ke bhi par chaak ho gae

jin ko samundaron ke bhanwar se lagao tha

maujon se khel khel ke tairak ho gae

kho aae kis ana mein wo apni tajalliyan

aaine sang kya hue bas KHak ho gae

karti rahi hain aandhiyan jin ke charag gul

jugnu wo shab ke aur bhi bebak ho gae

kya phir idhar se zard hawa ka guzar hua

KHushbu ke silsilon se chaman pak ho gae

kirdar be-kashish hai numaish ki dhup mein

'arshad' nazar mein qimti poshak ho gae