suraj ki raushni mein bikhre hue the sare

sūraj kī raushnī meñ bikhre hue the saare

jo raat kī siyāhī meñ saath the hamāre

aao farozāñ kar deñ aañsū ke kuchh sharāre

kuchh aur āsmāñ par ham Taañk deñ sitāre

milne kā vā'da kar ke phir chāñd kyoñ na aayā

naddī thī raah taktī gin gin ke raat taare

karvaT badalte dukh kī vahshat-zada ḳhamoshī

kamre kī khiḌkiyoñ se phir daf'atan pukāre

tāroñ ke ḳhvāb saare sajte haiñ shaam hī se

derīna ḳhvāhishoñ se nikhre haiñ māh-pāre

vīrān sī galī meñ thiiñ raunaqeñ hazāroñ

jo ḳhvāb raat dekhe vo saath the hamāre

chāhā thā ham ne bāñhoñ meñ le leñ chāñd hī ko

tāroñ kī anjuman ko bin farsh par utāre

kis gaam jā ke barseñ kis chhat pe bhiig jaa.eñ

ghar DhūñDte nagar meñ āvāra abr-pāre

suraj ki raushni mein bikhre hue the sare

jo raat ki siyahi mein sath the hamare

aao farozan kar den aansu ke kuchh sharare

kuchh aur aasman par hum Tank den sitare

milne ka wa'da kar ke phir chand kyon na aaya

naddi thi rah takti gin gin ke raat tare

karwaT badalte dukh ki wahshat-zada KHamoshi

kamre ki khiDkiyon se phir daf'atan pukare

taron ke KHwab sare sajte hain sham hi se

derina KHwahishon se nikhre hain mah-pare

viran si gali mein thin raunaqen hazaron

jo KHwab raat dekhe wo sath the hamare

chaha tha hum ne banhon mein le len chand hi ko

taron ki anjuman ko bin farsh par utare

kis gam ja ke barsen kis chhat pe bhig jaen

ghar DhunDte nagar mein aawara abr-pare