suraj ki sunahri kirnon se tabinda ruKH-e-alam na sahi

sūraj kī sunahrī kirnoñ se tābinda ruḳh-e-ālam na sahī

āsār-e-sahar to paidā haiñ kam zulmat-e-shām-e-ġham na sahī

ādāb-e-chaman se nā-vāqif zanjīr bapā dīvānoñ ko

ta.amīr-e-chaman kī fikr to hai taḳhrīb-e-chaman kā ġham na sahī

haañ yaad hameñ bhī kar lenā āsā.ish-e-manzil se pahle

ai qāfile vaalo ġham na karo ai manzil-e-jānāñ ham na sahī

anjām-e-safar kyā honā hai ye faisla mustaqbil degā

maidānoñ pe vahshat aaj bhī hai rāhoñ ke vo pech-o-ḳham na sahī

māyūs 'mujīb' itnā bhī na ho laġhzish to gunāh-e-ādam hai

manzil kī talab to mohkam hai idrāk-e-safar mohkam na sahī

suraj ki sunahri kirnon se tabinda ruKH-e-alam na sahi

aasar-e-sahar to paida hain kam zulmat-e-sham-e-gham na sahi

aadab-e-chaman se na-waqif zanjir bapa diwanon ko

tamir-e-chaman ki fikr to hai taKHrib-e-chaman ka gham na sahi

han yaad hamein bhi kar lena aasaish-e-manzil se pahle

ai qafile walo gham na karo ai manzil-e-jaanan hum na sahi

anjam-e-safar kya hona hai ye faisla mustaqbil dega

maidanon pe wahshat aaj bhi hai rahon ke wo pech-o-KHam na sahi

mayus 'mujib' itna bhi na ho laghzish to gunah-e-adam hai

manzil ki talab to mohkam hai idrak-e-safar mohkam na sahi