surat-e-barq-e-tapan shoala-fagan uTThe hain

sūrat-e-barq-e-tapāñ sho.ala-fagan uTThe haiñ

azm-e-nau le ke javānān-e-vatan uTThe haiñ

hifz-e-nāmūs-e-mohabbat ke liye dīvāne

apne dil meñ liye marne kī lagan uTThe haiñ

ruḳh zamāne kī havāoñ kā badalne vaale

aaj Daale hue māthe pe shikan uTThe haiñ

paikar-e-mehr-o-vafā ham haiñ magar majbūran

haath meñ teġh liye ġhalġhala-zan uTThe haiñ

aañch nāmūs-e-vatan par nahīñ aane deñge

ab to ham bāñdhe hue sar se kafan uTThe haiñ

chand lamhāt ke mehmān nazar aate haiñ

vo bagūle jo sar-e-sehn-e-chaman uTThe haiñ

ab añdheroñ se kaho ḳhair manā.eñ apnī

zarre dhartī ke mirī ban ke kiran uTThe haiñ

jab bhī aayā hai kaḌā vaqt chaman par 'manshā'

le ke ham hausla-e-fitna-shikan uTThe haiñ

surat-e-barq-e-tapan shoala-fagan uTThe hain

azm-e-nau le ke jawanan-e-watan uTThe hain

hifz-e-namus-e-mohabbat ke liye diwane

apne dil mein liye marne ki lagan uTThe hain

ruKH zamane ki hawaon ka badalne wale

aaj Dale hue mathe pe shikan uTThe hain

paikar-e-mehr-o-wafa hum hain magar majburan

hath mein tegh liye ghalghala-zan uTThe hain

aanch namus-e-watan par nahin aane denge

ab to hum bandhe hue sar se kafan uTThe hain

chand lamhat ke mehman nazar aate hain

wo bagule jo sar-e-sehn-e-chaman uTThe hain

ab andheron se kaho KHair manaen apni

zarre dharti ke meri ban ke kiran uTThe hain

jab bhi aaya hai kaDa waqt chaman par 'mansha'

le ke hum hausla-e-fitna-shikan uTThe hain