surat-e-sabza-e-be-gana chaman se guzre

sūrat-e-sabza-e-be-gāna chaman se guzre

ham musāfir kī tarah apne vatan se guzre

sahl hai na.ara-e-mansūr magar sahl nahīñ

har koī marhala-e-dār-o-rasan se guzre

lāla-o-gul ko tabassum kī ziyā dī ham ne

jalva-e-sub.h kī mānind chaman se guzre

hai ye kyā raushnī-e-fikr kī tīra-baḳhtī

jalva-e-rūh na pairāhan-e-tan se guzre

vo kare tajziya-e-mausam-e-gul jis kī nazar

bazm-e-gul meñ hadd-e-nasrīn-o-saman se guzre

dil pe kyā guzrī ye dil hī ko ḳhabar hai lekin

muskurāte hue ham dār-e-mehan se guzre

na kisī paañv kī aahaT na koī naqsh-e-qadam

qāfile ruuh ke yuuñ kūcha-e-tan se guzre

ek zarre meñ kabhī kho ga.iiñ kitnī kirneñ

kitne ḳhurshīd kabhī ek kiran se guzre

nik.hat-e-gesū-e-jānāñ bhī ajab thī 'hurmat'

ham tasavvur meñ ka.ī baar ḳhutan se guzre

surat-e-sabza-e-be-gana chaman se guzre

hum musafir ki tarah apne watan se guzre

sahl hai nara-e-mansur magar sahl nahin

har koi marhala-e-dar-o-rasan se guzre

lala-o-gul ko tabassum ki ziya di hum ne

jalwa-e-subh ki manind chaman se guzre

hai ye kya raushni-e-fikr ki tira-baKHti

jalwa-e-ruh na pairahan-e-tan se guzre

wo kare tajziya-e-mausam-e-gul jis ki nazar

bazm-e-gul mein hadd-e-nasrin-o-saman se guzre

dil pe kya guzri ye dil hi ko KHabar hai lekin

muskuraate hue hum dar-e-mehan se guzre

na kisi panw ki aahaT na koi naqsh-e-qadam

qafile ruh ke yun kucha-e-tan se guzre

ek zarre mein kabhi kho gain kitni kirnen

kitne KHurshid kabhi ek kiran se guzre

nikhat-e-gesu-e-jaanan bhi ajab thi 'hurmat'

hum tasawwur mein kai bar KHutan se guzre