surat hai teri dil mein ye naqsh-o-nigar kar

sūrat hai terī dil meñ ye naqsh-o-nigār kar

parvānoñ meñ ai sham.a mujhe bhī shumār kar

ā.eñge din milan ke bhale intizār kar

dil ko na yuuñ ai vahshat-e-ġham be-qarār kar

taqdīr kah rahī hai magar ab pukār kar

qismat meñ vo nahīñ tirī sabr-o-qarār kar

rasm-e-vafā tū pyaar ke sab iḳhtiyār kar

yuuñ jī ke zindagī ko ai dil yādgār kar

tū ishq ke junūñ meñ garebāñ na taar kar

izzat kā kuchh lihāz to apnī ai yaar kar

qurbānī kuchh bhī pyaar hai māñge agar ai dil

īsār de to pyaar ko kuchh na vichār kar

ḳhud ke liye na jī haiñ taqāze bhī pyaar ke

nām-e-vafā ko na tū kabhī dāġh-dār kar

us ne miTāyā ḳhud ko kisī aur ke liye

jaatā hai dūsre kī vo bigḌī sañvār kar

qurbānī hai aziim jo soche zarā ye gar

dekho gayā vo jiitī huī baazī haar kar

māthe pe hai shikan na haiñ āsār-e-ġham ayaañ

kyā shaan se chalā shab-e-ġham vo guzār kar

mushkil hai chaah gar ho ziyāda bhī had se ye

ai dil kabhī na itnā kisī ko dulār kar

haiñ ranj tere ġham ke alāva jahāñ meñ aur

ai dil tū un kā bhī to kabhī kuchh vaqār kar

samra taraqqiyoñ kā na paa.e haiñ log chand

jo qaum ke liye jiye sab kuchh nisār kar

lambā hai qissa jān-e-vafā kā ai 'saudāgar'

dilchasp hai bayān meñ kuchh iḳhtisār kar

surat hai teri dil mein ye naqsh-o-nigar kar

parwanon mein ai shama mujhe bhi shumar kar

aaenge din milan ke bhale intizar kar

dil ko na yun ai wahshat-e-gham be-qarar kar

taqdir kah rahi hai magar ab pukar kar

qismat mein wo nahin teri sabr-o-qarar kar

rasm-e-wafa tu pyar ke sab iKHtiyar kar

yun ji ke zindagi ko ai dil yaadgar kar

tu ishq ke junun mein gareban na tar kar

izzat ka kuchh lihaz to apni ai yar kar

qurbani kuchh bhi pyar hai mange agar ai dil

isar de to pyar ko kuchh na wichaar kar

KHud ke liye na ji hain taqaze bhi pyar ke

nam-e-wafa ko na tu kabhi dagh-dar kar

us ne miTaya KHud ko kisi aur ke liye

jata hai dusre ki wo bigDi sanwar kar

qurbani hai azim jo soche zara ye gar

dekho gaya wo jiti hui bazi haar kar

mathe pe hai shikan na hain aasar-e-gham ayan

kya shan se chala shab-e-gham wo guzar kar

mushkil hai chah gar ho ziyaada bhi had se ye

ai dil kabhi na itna kisi ko dular kar

hain ranj tere gham ke alawa jahan mein aur

ai dil tu un ka bhi to kabhi kuchh waqar kar

samra taraqqiyon ka na pae hain log chand

jo qaum ke liye jiye sab kuchh nisar kar

lamba hai qissa jaan-e-wafa ka ai 'saudagar'

dilchasp hai bayan mein kuchh iKHtisar kar