suraton ke shahr mein rauzan hi rauzan dekh kar

sūratoñ ke shahr meñ rauzan hī rauzan dekh kar

ghar meñ aa baiThe kushāda ghar kā āñgan dekh kar

log Daale haiñ badan par fikr ke rañgīñ ġhilāf

ā.inoñ meñ shaḳhsiyat kā khurdurā-pan dekh kar

bad-gumāñ ahbāb hote haiñ to hone dījiye

baat kyuuñ ho fikr-o-fan kī rañg-o-roġhan dekh kar

ham chale the ḳhvāhishoñ kā tajziya karne magar

ruk ga.e haiñ īn-o-āñ kī tez dhaḌkan dekh kar

ab to vīrāna hī vīrāna hai shahr-e-dard meñ

kitne din royā kiye ḳhvāboñ kā madfan dekh kar

zehn tum ko jis taraf le jaa.e ai 'tanvīr' jaao

kyā karoge maslak-e-shaiḳh-o-barahman dekh kar

suraton ke shahr mein rauzan hi rauzan dekh kar

ghar mein aa baiThe kushada ghar ka aangan dekh kar

log Dale hain badan par fikr ke rangin ghilaf

aainon mein shaKHsiyat ka khurdura-pan dekh kar

bad-guman ahbab hote hain to hone dijiye

baat kyun ho fikr-o-fan ki rang-o-roghan dekh kar

hum chale the KHwahishon ka tajziya karne magar

ruk gae hain in-o-an ki tez dhaDkan dekh kar

ab to virana hi virana hai shahr-e-dard mein

kitne din roya kiye KHwabon ka madfan dekh kar

zehn tum ko jis taraf le jae ai 'tanwir' jao

kya karoge maslak-e-shaiKH-o-barahman dekh kar