تعاون بھی ملا فریاد و آہ و اشک باری کا

تعاون بھی ملا فریاد و آہ و اشک باری کا

مگر یوںہی کیا ہر مرحلہ طے بے قراری کا

قرائن سے ذرا بھی روشنی اس پر نہیں پڑتی

کہ دل مشتاق کب سے تھا فضائے سوگواری کا

ترے شیدائی پھر بھی جاں بحق ہونے کو حاضر ہیں

کوئی جذبہ نہیں اس بار گرچہ جاں نثاری کا

مگر وہ سخت جاں قطرہ بھی آنکھوں میں نہیں آتا

چلن زندہ رکھا جائے تو کیسے غم گساری کا

سمجھ میں کچھ نہیں آتا مگر دلچسپی قائم ہے

یہی تو کارنامہ ہے اس البیلے مداری کا