تعلق کے نئے انداز سے خاکے بناتا ہے

تعلق کے نئے انداز سے خاکے بناتا ہے

کوئی دیوار چنتا ہے وہ دروازے بناتا ہے

گزر جاتی ہے اپنی حد سے جب آنگن کی تنہائی

لکیریں کھینچ کے کاغذ پہ وہ بچے بناتا ہے

ہنر آتا ہے اس کو وقت کے تیور بدلنے کا

مگر وہ کاغذی پھولوں کے گلدستے بناتا ہے

سزا کا مستحق ٹھہرا رہے ہو کس لیے اس کو

حقیقت تم سمجھتے ہو وہ افسانے بناتا ہے

پریشانی ہماری چھو رہی ہے آسمانوں کو

کبھی باتیں بناتا تھا وہ اب قصے بناتا ہے

نتیجہ اپنی فن کاری کا ہے پیش نظر اس کے

مگر وہ پتھروں کی زد میں آئینے بناتا ہے

لہو تو صاف ہو جائے گا سڑکوں کا مگر انورؔ

اسے بھی ذہن میں رکھو جو منصوبے بناتا ہے