talluq ke nae andaz se KHake banata hai

ta'alluq ke na.e andāz se ḳhāke banātā hai

koī dīvār chuntā hai vo darvāze banātā hai

guzar jaatī hai apnī had se jab āñgan kī tanhā.ī

lakīreñ khīñch ke kāġhaz pe vo bachche banātā hai

hunar aatā hai us ko vaqt ke tevar badalne kā

magar vo kāġhazī phūloñ ke gul-daste banātā hai

sazā kā mustahiq Thahrā rahe ho kis liye us ko

haqīqat tum samajhte ho vo afsāne banātā hai

pareshānī hamārī chhū rahī hai āsmānoñ ko

kabhī bāteñ banātā thā vo ab qisse banātā hai

natīja apnī fankārī kā hai pesh-e-nazar us ke

magar vo pattharoñ kī zad meñ ā.īne banātā hai

lahū to saaf ho jā.egā saḌkoñ kā magar 'anvar'

use bhī zehn meñ rakkho jo mansūbe banātā hai

ta'alluq ke nae andaz se KHake banata hai

koi diwar chunta hai wo darwaze banata hai

guzar jati hai apni had se jab aangan ki tanhai

lakiren khinch ke kaghaz pe wo bachche banata hai

hunar aata hai us ko waqt ke tewar badalne ka

magar wo kaghazi phulon ke gul-daste banata hai

saza ka mustahiq Thahra rahe ho kis liye us ko

haqiqat tum samajhte ho wo afsane banata hai

pareshani hamari chhu rahi hai aasmanon ko

kabhi baaten banata tha wo ab qisse banata hai

natija apni fankari ka hai pesh-e-nazar us ke

magar wo pattharon ki zad mein aaine banata hai

lahu to saf ho jaega saDkon ka magar 'anwar'

use bhi zehn mein rakkho jo mansube banata hai