ta-ba-aflak agar apni rasai hoti

tā-ba-aflāk agar apnī rasā.ī hotī

kuchh ta.ajjub nahīñ qabze meñ ḳhudā.ī hotī

nāsehā ham ko tabī.at pe jo qaabū hotā

dil sī daulat sar-e-bāzār gañvā.ī hotī

maut ne mujh ko farāmosh kiyā ḳhuub kiyā

aap ne aañkh na ai kaash churā.ī hotī

merī miTTī ko Thikāne jo lagāyā thā tujhe

sū-e-but-ḳhāna ye kam-baḳht uḌaa.ī hotī

sab ko tum sāġhar-e-zarrīñ meñ pilāte ho sharāb

hameñ talchhaT hī shikore meñ pilā.ī hotī

raat din shaiḳh-e-haram kalima butoñ kā paḌhtā

but-kade meñ jo kabhī us kī rasā.ī hotī

bhūlte ham na kabhī bād-e-sabā kā ehsāñ

kākul-e-yār kī ḳhushbū jo suñghā.ī hotī

pūchhtā maiñ bhī mizāj aap kā shoḳhī se yūñhī

choT dil kī jo kahīñ aap ne khaa.ī hotī

thā azal se dil-e-'āzam' meñ koī aur makīñ

us meñ kyā ishq hasīnāñ kī samā.ī hotī

ta-ba-aflak agar apni rasai hoti

kuchh tajjub nahin qabze mein KHudai hoti

naseha hum ko tabiat pe jo qabu hota

dil si daulat sar-e-bazar ganwai hoti

maut ne mujh ko faramosh kiya KHub kiya

aap ne aankh na ai kash churai hoti

meri miTTi ko Thikane jo lagaya tha tujhe

su-e-but-KHana ye kam-baKHt uDai hoti

sab ko tum saghar-e-zarrin mein pilate ho sharab

hamein talchhaT hi shikore mein pilai hoti

raat din shaiKH-e-haram kalima buton ka paDhta

but-kade mein jo kabhi us ki rasai hoti

bhulte hum na kabhi baad-e-saba ka ehsan

kakul-e-yar ki KHushbu jo sunghai hoti

puchhta main bhi mizaj aap ka shoKHi se yunhi

choT dil ki jo kahin aap ne khai hoti

tha azal se dil-e-'azam' mein koi aur makin

us mein kya ishq hasinan ki samai hoti