ta-der hum ba-dida-e-tar dekhte rahe

tā-der ham ba-dīda-e-tar dekhte rahe

yādeñ thiiñ jis meñ dafn vo ghar dekhte rahe

kyā kyā na e'tibār diyā ik sarāb ne

har-chand tishna-lab the magar dekhte rahe

sūraj chaḌhā to phir bhī vahī log zad meñ the

shab bhar jo intizār-e-sahar dekhte rahe

sehn-e-chaman ko apne lahū se sañvār kar

dast-e-havas meñ ham gul-e-tar dekhte rahe

ye dil hī jāntā hai ki kis hausle ke saath

nāqadrī-e-matā-e-hunar dekhte rahe

'mohsin' urūj-e-kam-nazarāñ sāneha nahīñ

ye sāneha hai ahl-e-nazar dekhte rahe

ta-der hum ba-dida-e-tar dekhte rahe

yaaden thin jis mein dafn wo ghar dekhte rahe

kya kya na e'tibar diya ek sarab ne

har-chand tishna-lab the magar dekhte rahe

suraj chaDha to phir bhi wahi log zad mein the

shab bhar jo intizar-e-sahar dekhte rahe

sehn-e-chaman ko apne lahu se sanwar kar

dast-e-hawas mein hum gul-e-tar dekhte rahe

ye dil hi jaanta hai ki kis hausle ke sath

naqadri-e-mata-e-hunar dekhte rahe

'mohsin' uruj-e-kam-nazaran saneha nahin

ye saneha hai ahl-e-nazar dekhte rahe