تا زندگی وفا کو نبھایا تو کیا کیا

تا زندگی وفا کو نبھایا تو کیا کیا

اک روگ اپنے جی کو لگایا تو کیا کیا

غفلت میں جو ہوا مجھے اس کا تو غم نہیں

غم ہے تو یہ کہ ہوش بھی آیا تو کیا کیا

مینا میں میرے حصے کی اک بوند بھی نہ تھی

میں نے بھی اپنا جام بڑھایا تو کیا کیا

وہ شوق دل وہ جستجو وہ جوش انتظار

اور جب وہ میرے روبرو آیا تو کیا کیا

گر لا سکا نہ باد مخالف کی تاب تو

امید کا چراغ جلایا تو کیا کیا

لائیں گی رنگ موہنیؔ ناکامیاں تری

نیرنگیٔ زماں نے ستایا تو کیا کیا