ta-zindagi wafa ko nibhaya to kya kiya

tā-zindagī vafā ko nibhāyā to kyā kiyā

ik rog apne jī ko lagāyā to kyā kiyā

ġhaflat meñ jo huā mujhe us kā to ġham nahīñ

ġham hai to ye ki hosh bhī aaya to kyā kiyā

miinā meñ mere hisse kī ik buuñd bhī na thī

maiñ ne bhī apnā jaam baḌhāyā to kyā kiyā

vo shauq-e-dil vo justujū vo josh-e-intizār

aur jab vo mere rū-ba-rū aaya to kyā kiyā

gar lā sakā na bād-e-muḳhālif kī taab tū

ummīd kā charāġh jalāyā to kyā kiyā

lā.eñgī rang 'mohnī' nākāmiyāñ tirī

nairangī-e-zamāñ ne satāyā to kyā kiyā

ta-zindagi wafa ko nibhaya to kya kiya

ek rog apne ji ko lagaya to kya kiya

ghaflat mein jo hua mujhe us ka to gham nahin

gham hai to ye ki hosh bhi aaya to kya kiya

mina mein mere hisse ki ek bund bhi na thi

main ne bhi apna jam baDhaya to kya kiya

wo shauq-e-dil wo justuju wo josh-e-intizar

aur jab wo mere ru-ba-ru aaya to kya kiya

gar la saka na baad-e-muKHalif ki tab tu

ummid ka charagh jalaya to kya kiya

laengi rang 'mohni' nakaamiyan teri

nairangi-e-zaman ne sataya to kya kiya