tab-e-nigah thi to nazara bhi dost tha

tāb-e-nigāh thī to nazāra bhī dost thā

us chashm-e-nargisīñ kā ishāra bhī dost thā

TuuTā to āsmāñ se ḳhalāoñ meñ kho gayā

jab tak chamak rahā thā sitāra bhī dost thā

ham khelte the aag se jis sin meñ un dinoñ

chingāriyāñ thiiñ phuul sharārā bhī dost thā

aThkheliyāñ thiiñ ret pe maujoñ kī duur tak

Thahrī huī nadī kā kinārā bhī dost thā

ġham-ḳhvāriyāñ thiiñ sheva dil-e-dard-mañd kā

laakh ajnabī ho 'ishq kā maarā bhī dost thā

rāteñ ḳhayāl-o-ḳhvāb se ārāsta rahīñ

pahlū meñ ek anjuman-ārā bhī dost thā

miTTī kā rizq ho gayā kuchh yādeñ chhoḌ kar

kis se kaheñ ki shaad sā pyārā bhī dost thā

kis tarah jā milā hai saf-e-dushmanāñ meñ vo

'ishrat' jo ek shaḳhs hamārā bhī dost thā

tab-e-nigah thi to nazara bhi dost tha

us chashm-e-nargisin ka ishaara bhi dost tha

TuTa to aasman se KHalaon mein kho gaya

jab tak chamak raha tha sitara bhi dost tha

hum khelte the aag se jis sin mein un dinon

chingariyan thin phul sharara bhi dost tha

aThkheliyan thin ret pe maujon ki dur tak

Thahri hui nadi ka kinara bhi dost tha

gham-KHwariyan thin shewa dil-e-dard-mand ka

lakh ajnabi ho 'ishq ka mara bhi dost tha

raaten KHayal-o-KHwab se aarasta rahin

pahlu mein ek anjuman-ara bhi dost tha

miTTi ka rizq ho gaya kuchh yaaden chhoD kar

kis se kahen ki shad sa pyara bhi dost tha

kis tarah ja mila hai saf-e-dushmanan mein wo

'ishrat' jo ek shaKHs hamara bhi dost tha