tabinda husn-e-raaz-e-bahaaran hamin se hai

tābinda husn-e-rāz-e-bahārāñ hamīñ se hai

nazm-e-ḳhizāñ jo hai to hirāsāñ hamīñ se hai

apne lahū kā rañg milā hai bahār meñ

laala misāl-e-shola-e-raqsāñ hamīñ se hai

jaltā hai apnā ḳhuuñ hī sar-e-bazm rāt-bhar

ai husn-e-be-ḳhabar ye charāġhāñ hamīñ se hai

ham aaj shahr-e-yār ke ma.atūb haiñ to kyā

har-dam vo apne shahr meñ tarsāñ hamīñ se hai

rakkhī hai ham ne apnī zabāñ par vafā kī teġh

nām-e-nikū-e-yār pur-afshāñ hamīñ se hai

har-rañg meñ rahe hamīñ sar-chashma-e-hayāt

hai kā.enāt ham se to yazdāñ hamīñ se hai

marhūn-e-shuq bāda-gusārāñ hai daur-e-jām

miinā huzūr-e-yār ġhazal-ḳhvāñ hamīñ se hai

shohrā tirā gayā mire naġhmoñ ke saath saath

aalam ko terī diid kā armāñ hamīñ se hai

āñkhoñ meñ 'arsh' dard ne bhaḌkā.e haiñ kañval

āb-e-ravāñ meñ ātish-e-sozāñ hamīñ se hai

tabinda husn-e-raaz-e-bahaaran hamin se hai

nazm-e-KHizan jo hai to hirasan hamin se hai

apne lahu ka rang mila hai bahaar mein

lala misal-e-shola-e-raqsan hamin se hai

jalta hai apna KHun hi sar-e-bazm raat-bhar

ai husn-e-be-KHabar ye charaghan hamin se hai

hum aaj shahr-e-yar ke matub hain to kya

har-dam wo apne shahr mein tarsan hamin se hai

rakkhi hai hum ne apni zaban par wafa ki tegh

nam-e-niku-e-yar pur-afshan hamin se hai

har-rang mein rahe hamin sar-chashma-e-hayat

hai kaenat hum se to yazdan hamin se hai

marhun-e-shuq baada-gusaran hai daur-e-jam

mina huzur-e-yar ghazal-KHwan hamin se hai

shohra tera gaya mere naghmon ke sath sath

aalam ko teri did ka arman hamin se hai

aankhon mein 'arsh' dard ne bhaDkae hain kanwal

aab-e-rawan mein aatish-e-sozan hamin se hai