tabish-e-dandan se un ke rishta-e-gauhar khula

tābish-e-dandāñ se un ke rishta-e-gauhar khulā

āsmāñ par jalva-e-ruḳhsār se aḳhtar khulā

sāmne baiThe the vo ḳhalvat thī aur koī na thā

aise aalam meñ hamāre shauq kā daftar khulā

munkir us but ke jo haiñ paate haiñ vo achchhī sazā

chūmte haiñ jā ke ka.aba meñ vahī patthar khulā

maiñ shamīm-e-nik.hat-e-gul kā kahāñ pā.ūñ dimāġh

sāmne yuuñ to nigāhoñ ke hai ik manzar khulā

jab chalī auroñ pe kyā be-āb ho kar rah ga.ī

merī gardan par chalī tab teġh kā jauhar khulā

ik tilism-e-āb-o-gil hī to hai saarī zindagī

raaz ye koī batā.e jiite jī kis par khulā

vahshat-e-ahl-e-junūñ is darja ab mādūm hai

rāt-din rahne lagā zindāñ kā ab to dar khulā

ban ga.ī kunjī zamīn-e-sher-e-ġhālib kyā kahūñ

ya.anī 'māhir' aaj ye qufl-e-sukūt āḳhar khulā

tabish-e-dandan se un ke rishta-e-gauhar khula

aasman par jalwa-e-ruKHsar se aKHtar khula

samne baiThe the wo KHalwat thi aur koi na tha

aise aalam mein hamare shauq ka daftar khula

munkir us but ke jo hain pate hain wo achchhi saza

chumte hain ja ke kaba mein wahi patthar khula

main shamim-e-nikhat-e-gul ka kahan paun dimagh

samne yun to nigahon ke hai ek manzar khula

jab chali auron pe kya be-ab ho kar rah gai

meri gardan par chali tab tegh ka jauhar khula

ek tilism-e-ab-o-gil hi to hai sari zindagi

raaz ye koi batae jite ji kis par khula

wahshat-e-ahl-e-junun is darja ab madum hai

raat-din rahne laga zindan ka ab to dar khula

ban gai kunji zamin-e-sher-e-ghaalib kya kahun

yani 'mahir' aaj ye qufl-e-sukut aaKHar khula