taib nahin hun be-KHud-o-sarshaar bhi nahin

taa.ib nahīñ huuñ be-ḳhud-o-sarshār bhī nahīñ

jo is tarah piye vo gunahgār bhī nahīñ

zindān-e-rang-o-bū meñ guzārī hai umr yuuñ

āzād bhī nahīñ huuñ giraftār bhī nahīñ

itnī sī baat hai vo taġhāful-shi.ār hai

gar mehrbāñ nahīñ to sitamgār bhī nahīñ

kyā pūchhte ho āshiq-e-be-dil kī aarzū

jab dil nahīñ to hasrat-e-dīdār bhī nahīñ

bole ki tum ko qatl kiyā maiñ ne kis tarah

dekho zarā ki haath meñ talvār bhī nahīñ

vīrāñ kiyā hai yaas ne yuuñ bāġh-e-ārzū

phūloñ kā zikr kyā hai vahāñ ḳhaar bhī nahīñ

gar dostoñ ke lutf kā qaa.il nahīñ huuñ maiñ

lab par mire shikāyat-e-aġhyār bhī nahīñ

taib nahin hun be-KHud-o-sarshaar bhi nahin

jo is tarah piye wo gunahgar bhi nahin

zindan-e-rang-o-bu mein guzari hai umr yun

aazad bhi nahin hun giraftar bhi nahin

itni si baat hai wo taghaful-shiar hai

gar mehrban nahin to sitamgar bhi nahin

kya puchhte ho aashiq-e-be-dil ki aarzu

jab dil nahin to hasrat-e-didar bhi nahin

bole ki tum ko qatl kiya main ne kis tarah

dekho zara ki hath mein talwar bhi nahin

viran kiya hai yas ne yun bagh-e-arzu

phulon ka zikr kya hai wahan KHar bhi nahin

gar doston ke lutf ka qail nahin hun main

lab par mere shikayat-e-aghyar bhi nahin