tair-e-dil jo tera dhyan pakaD leta hai

tā.ir-e-dil jo tirā dhyān pakaḌ letā hai

choñch meñ taḳht-e-sulaimān pakaḌ letā hai

mere andar bhī koī shaḳhs hai rahtā aisā

chup rahūñ to vo garebān pakaḌ letā hai

jab dil-o-jāñ liye aatā huuñ galī meñ terī

kaun hai jo mirā sāmān pakaḌ letā hai

pūchh letā huuñ agar pyaar hai kitnā mujh se

uTh ke hāthoñ meñ vo qur.ān pakaḌ letā hai

yuuñ to manzil mirī lahore hai lekin rah meñ

gujrāñwala hai jo mehmān pakaḌ letā hai

vasl-lamhoñ meñ hai āsān mohabbat karnā

hijr meñ qais bhī ho kaan pakaḌ letā hai

lauTtā huuñ to sisakte haiñ darīche saare

aage baḌhtā huuñ to darbān pakaḌ letā hai

mahv ho jā.ūñ jo maiñ misr ke jalvoñ meñ kabhī

merā dāman mirā kan’ān pakaḌ letā hai

jab bhī miltā hai mujhe izn-e-rihā.ī 'sāgar'

phir mujhe gosha-e-zindān pakaḌ letā hai

tair-e-dil jo tera dhyan pakaD leta hai

chonch mein taKHt-e-sulaiman pakaD leta hai

mere andar bhi koi shaKHs hai rahta aisa

chup rahun to wo gareban pakaD leta hai

jab dil-o-jaan liye aata hun gali mein teri

kaun hai jo mera saman pakaD leta hai

puchh leta hun agar pyar hai kitna mujh se

uTh ke hathon mein wo quran pakaD leta hai

yun to manzil meri lahore hai lekin rah mein

gujranwala hai jo mehman pakaD leta hai

wasl-lamhon mein hai aasan mohabbat karna

hijr mein qais bhi ho kan pakaD leta hai

lauTta hun to sisakte hain dariche sare

aage baDhta hun to darban pakaD leta hai

mahw ho jaun jo main misr ke jalwon mein kabhi

mera daman mera kan’an pakaD leta hai

jab bhi milta hai mujhe izn-e-rihai 'sagar'

phir mujhe gosha-e-zindan pakaD leta hai