taj-e-zarrin na koi masnad-e-shahi mangun

tāj-e-zarrīñ na koī masnad-e-shāhī māñgūñ

maiñ to bas apne hī hone kī gavāhī māñgūñ

mujh ko suqrāt kā mansab nahīñ hāsil karnā

kyā maiñ sach bol ke apnī hī tabāhī māñgūñ

haar jā.ūñgā to miTTī ke qadam chūmūñgā

girtī dīvār se kyā pusht-panāhī māñgūñ

zeb detā hai mire tan pe faqīrī kā libās

kisī darbār se kyā ḳhil.at-e-jāhī māñgūñ

merī vahshat ko ye sahrā kī masāfat kam hai

sair ke vāste kuchh aur fazā hī māñgūñ

tīrgī meñ abhī itnā to nahīñ Duubā huuñ

ki na.e din ke ḳhazāne se bhī syāhī māñgūñ

taj-e-zarrin na koi masnad-e-shahi mangun

main to bas apne hi hone ki gawahi mangun

mujh ko suqraat ka mansab nahin hasil karna

kya main sach bol ke apni hi tabahi mangun

haar jaunga to miTTi ke qadam chumunga

girti diwar se kya pusht-panahi mangun

zeb deta hai mere tan pe faqiri ka libas

kisi darbar se kya KHilat-e-jahi mangun

meri wahshat ko ye sahra ki masafat kam hai

sair ke waste kuchh aur faza hi mangun

tirgi mein abhi itna to nahin Duba hun

ki nae din ke KHazane se bhi syahi mangun