تاجداروں سے مرا رشتہ نہ تھا

تاجداروں سے مرا رشتہ نہ تھا

اس لئے بھی قد مرا اونچا نہ تھا

جب نظر نے آئینہ دیکھا نہ تھا

مرے رخ پر ایک بھی دھبہ نہ تھا

اس سے کیوں بیزار تھے اہل نظر

تمکنت میں وہ اگر ڈوبا نہ تھا

ذلتیں وہ جانتا کیا عشق کی

خلوتوں میں جو کبھی رویا نہ تھا

آپ تو خود پیکر کردار تھے

آپ کو کردار سے گرنا نہ تھا

بستیاں سمٹی ہوئی تھیں جب تلک

جنگلوں کو کوئی بھی خطرہ نہ تھا

کیا بتاتے قاعدے کی بات ہم

گھر میں کوئی مشورہ کرتا نہ تھا

کیسے جاتیں میرے گھر سے گردشیں

گردشوں سے تو مرا یارانہ تھا