tajdaron se mera rishta na tha

tājdāroñ se mirā rishta na thā

is liye bhī qad mirā ūñchā na thā

jab nazar ne aa.ina dekhā na thā

mere ruḳh par ek bhī dhabba na thā

us se kyuuñ be-zār the ahl-e-nazar

tamkanat meñ vo agar Duubā na thā

zillateñ vo jāntā kyā ishq kī

ḳhalvatoñ meñ jo kabhī royā na thā

aap to ḳhud paikar-e-kirdār the

aap ko kirdār se girnā na thā

bastiyāñ simTī huī thiiñ jab talak

jañgaloñ ko koī bhī ḳhatra na thā

kyā batāte qā.ede kī baat ham

ghar meñ koī mashvara kartā na thā

kaise jātīñ mere ghar se gardisheñ

gardishoñ se to mirā yārāna thā

tajdaron se mera rishta na tha

is liye bhi qad mera uncha na tha

jab nazar ne aaina dekha na tha

mere ruKH par ek bhi dhabba na tha

us se kyun be-zar the ahl-e-nazar

tamkanat mein wo agar Duba na tha

zillaten wo jaanta kya ishq ki

KHalwaton mein jo kabhi roya na tha

aap to KHud paikar-e-kirdar the

aap ko kirdar se girna na tha

bastiyan simTi hui thin jab talak

jangalon ko koi bhi KHatra na tha

kya batate qaede ki baat hum

ghar mein koi mashwara karta na tha

kaise jatin mere ghar se gardishen

gardishon se to mera yarana tha