تالاب سے نکل کے سمندر میں آ گیا

تالاب سے نکل کے سمندر میں آ گیا

اس بار سندباد مرے گھر میں آ گیا

بے چہرہ گردنوں کی شکایت فضول ہے

معصوم ہاتھ قبضۂ خنجر میں آ گیا

دیکھا ہی تھا خلا سے پلٹ کر زمین کو

ہر قطرۂ لہو مرے شہپر میں آ گیا

دریا کے لاکھ ہاتھ مجھے روکتے رہے

میں نے لگام اٹھائی بہتر میں آ گیا

ایسی بلندیوں کی تمنا کبھی نہ تھی

ذرہ ہوں گرد باد کے چکر میں آ گیا

سر پر گناہ گار کے پھینکا نہیں ابھی

دھبہ کہاں سے ہاتھ کے پتھر میں آ گیا

اس عہد میں جہاں بھی ہوا تیز و تند ہو

طوفان سا بیاض مظفرؔ میں آ گیا