talab se nikal ke samandar mein aa gaya

tālāb se nikal ke samandar meñ aa gayā

is baar sindbād mire ghar meñ aa gayā

be-chehra gardanoñ kī shikāyat fuzūl hai

mā'sūm haath qabza-e-ḳhanjar meñ aa gayā

dekhā hī thā ḳhalā se palaT kar zamīn ko

har qatra-e-lahū mire shahpar meñ aa gayā

dariyā ke laakh haath mujhe rokte rahe

maiñ ne lagām uThā.ī bahattar meñ aa gayā

aisī bulandiyoñ kī tamannā kabhī na thī

zarra huuñ gard-bād ke chakkar meñ aa gayā

sar par gunāhgār ke pheñkā nahīñ abhī

dhabba kahāñ se haath ke patthar meñ aa gayā

is 'ahd meñ jahāñ bhī havā tez-o-tund ho

tūfān sā bayāz-e-'muzaffar' meñ aa gayā

talab se nikal ke samandar mein aa gaya

is bar sindbaad mere ghar mein aa gaya

be-chehra gardanon ki shikayat fuzul hai

ma'sum hath qabza-e-KHanjar mein aa gaya

dekha hi tha KHala se palaT kar zamin ko

har qatra-e-lahu mere shahpar mein aa gaya

dariya ke lakh hath mujhe rokte rahe

main ne lagam uThai bahattar mein aa gaya

aisi bulandiyon ki tamanna kabhi na thi

zarra hun gard-baad ke chakkar mein aa gaya

sar par gunahgar ke phenka nahin abhi

dhabba kahan se hath ke patthar mein aa gaya

is 'ahd mein jahan bhi hawa tez-o-tund ho

tufan sa bayaz-e-'muzaffar' mein aa gaya