talib-e-did ko manzil-e-ishq mein kaun kahta hai ye rahbar chahiye

tālib-e-dīd ko manzil-e-'ishq meñ kaun kahtā hai ye rāhbar chāhiye

un kā jalva har ik shai meñ maujūd hai mo'tabar apnā zauq-e-nazar chāhiye

ham asīroñ kā sayyād armāñ ye hai bas nazar bhar ke phir āshiyāñ dekh leñ

go ye sach hai ki parvāz ke vāste kuchh na kuchh quvvat-e-bāl-o-par chāhiye

saḳhtiyāñ kaisī aur kaisī nākāmiyāñ manzil-e-'ishq meñ kaisī dushvāriyāñ

kāmyābī qadam-bos hone lage 'azm-e-mohkam meñ itnā asar chāhiye

ai nasīm-e-sahar aisā dhoka na de āmad-e-fasl-e-gul kā sahārā na de

rut na badle ki badle hameñ kyā ġharaz ham ko aane kī un ke ḳhabar chāhiye

maiñ jagah kī parastish to kartā nahīñ ik tasavvur ke aage jhukātā huuñ sar

nāsehā mujh ko samjhānā bekār hai aur hoñge jinheñ sang-e-dar chāhiye

dāstāneñ sunāne se kyā fā.eda rāz-e-ulfat batāne se kyā fā.eda

‘ishq-e-ḳhud.dār ye mashvara hai mirā husn se guftugū muḳhtasar chāhiye

rāh-e-ulfat meñ rakkhā hai pahlā qadam aur zid hai ki pūchheñge hālāt-e-ġham

kījiye jān-e-'ishrat' na qāsir hameñ rāz-dāñ 'ishq kā mo'tabar chāhiye

talib-e-did ko manzil-e-'ishq mein kaun kahta hai ye rahbar chahiye

un ka jalwa har ek shai mein maujud hai mo'tabar apna zauq-e-nazar chahiye

hum asiron ka sayyaad arman ye hai bas nazar bhar ke phir aashiyan dekh len

go ye sach hai ki parwaz ke waste kuchh na kuchh quwwat-e-baal-o-par chahiye

saKHtiyan kaisi aur kaisi nakaamiyan manzil-e-'ishq mein kaisi dushwariyan

kaamyabi qadam-bos hone lage 'azm-e-mohkam mein itna asar chahiye

ai nasim-e-sahar aisa dhoka na de aamad-e-fasl-e-gul ka sahaara na de

rut na badle ki badle hamein kya gharaz hum ko aane ki un ke KHabar chahiye

main jagah ki parastish to karta nahin ek tasawwur ke aage jhukata hun sar

naseha mujh ko samjhana bekar hai aur honge jinhen sang-e-dar chahiye

dastanen sunane se kya faeda raaz-e-ulfat batane se kya faeda

‘ishq-e-KHuddar ye mashwara hai mera husn se guftugu muKHtasar chahiye

rah-e-ulfat mein rakkha hai pahla qadam aur zid hai ki puchhenge haalat-e-gham

kijiye jaan-e-'ishrat' na qasir hamein raaz-dan 'ishq ka mo'tabar chahiye