طالب دید کو منزل عشق میں کون کہتا ہے یہ راہبر چاہئے

طالب دید کو منزل عشق میں کون کہتا ہے یہ راہبر چاہئے

ان کا جلوہ ہر اک شے میں موجود ہے معتبر اپنا ذوق نظر چاہئے

ہم اسیروں کا صیاد ارماں یہ ہے بس نظر بھر کے پھر آشیاں دیکھ لیں

گو یہ سچ ہے کہ پرواز کے واسطے کچھ نہ کچھ قوت بال و پر چاہئے

سختیاں کیسی اور کیسی ناکامیاں منزل عشق میں کیسی دشواریاں

کامیابی قدم بوس ہونے لگے عزم محکم میں اتنا اثر چاہئے

اے نسیم سحر ایسا دھوکہ نہ دے آمد فصل گل کا سہارا نہ دے

رت نہ بدلے کہ بدلے ہمیں کیا غرض ہم کو آنے کی ان کے خبر چاہئے

میں جگہ کی پرستش تو کرتا نہیں اک تصور کے آگے جھکاتا ہوں سر

ناصحا مجھ کو سمجھانا بے کار ہے اور ہوں گے جنہیں سنگ در چاہئے

داستانیں سنانے سے کیا فائدہ راز الفت بتانے سے کیا فائدہ

عشق خوددار یہ مشورہ ہے مرا حسن سے گفتگو مختصر چاہیے

راہ الفت میں رکھا ہے پہلا قدم اور ضد ہے کہ پوچھیں گے حالات غم

کیجئے جان عشرتؔ نہ قاصر ہمیں رازداں عشق کا معتبر چاہئے