talluq ke bahaw ka muqaddam istiara kis jagah hai

ta.alluq ke bahāv kā muqaddam isti.āra kis jagah hai

mire gahre samundar terī vahshat kā kināra kis jagah hai

batā ai roz-o-shab kī be-sabātī meñ tavāzun rakhne vaale

jise kal TūTnā hai aaj vo raushan sitāra kis jagah hai

batā sarsabz khetoñ se guzarne vaale be-āvāz dariyā

achānak pech khā kar ruḳh badalne kā ishāra kis jagah hai

bashārat jis ke hone kī mujhe pahle qadam par dī ga.ī thī

vo gahre abr kā saaya masāfat kā sahārā kis jagah hai

safar karnā hai aur andhā musāfir sochtā hai kis se pūchhe

sar-e-hastī añdhere rāstoñ kā goshvāra kis jagah hai

na sat.h-e-āb par hai aur na tah meñ is ke haiñ āsār koī

batā ai bahr-e-ġham kāġhaz kī kashtī ko utārā kis jagah hai

talluq ke bahaw ka muqaddam istiara kis jagah hai

mere gahre samundar teri wahshat ka kinara kis jagah hai

bata ai roz-o-shab ki be-sabaati mein tawazun rakhne wale

jise kal TuTna hai aaj wo raushan sitara kis jagah hai

bata sarsabz kheton se guzarne wale be-awaz dariya

achanak pech kha kar ruKH badalne ka ishaara kis jagah hai

bashaarat jis ke hone ki mujhe pahle qadam par di gai thi

wo gahre abr ka saya masafat ka sahaara kis jagah hai

safar karna hai aur andha musafir sochta hai kis se puchhe

sar-e-hasti andhere raston ka goshwara kis jagah hai

na sath-e-ab par hai aur na tah mein is ke hain aasar koi

bata ai bahr-e-gham kaghaz ki kashti ko utara kis jagah hai