talluq TuTne ka gham uThana bhi zaruri tha

ta.alluq TūTne kā ġham uThānā bhī zarūrī thā

zarūrī tum bhī the lekin zamāna bhī zarūrī thā

terī āñkhoñ kī bechainī mirī zanjīr thī lekin

khaḌī thī rail-gāḌī aur jaanā bhī zarūrī thā

mohabbat kā badal kuchh bhī agar hai to mohabbat hai

ga.e the jis tarah vaise hī aanā bhī zarūrī thā

agar maiñ farz thā to phir nibhāyā kyoñ nahīñ tum ne

agar maiñ qarz thā to phir chukānā bhī zarūrī thā

maiñ kab tak raaz rakhtā dil meñ apnī bevafā.ī kā

ye baat aa kar tumheñ ik din batānā bhī zarūrī thā

fazā meñ is tarah uḌtā rahegā mustaqil kab tak

parinde ke liye ik āshiyānā bhī zarūrī thā

talluq TuTne ka gham uThana bhi zaruri tha

zaruri tum bhi the lekin zamana bhi zaruri tha

teri aankhon ki bechaini meri zanjir thi lekin

khaDi thi rail-gaDi aur jaana bhi zaruri tha

mohabbat ka badal kuchh bhi agar hai to mohabbat hai

gae the jis tarah waise hi aana bhi zaruri tha

agar main farz tha to phir nibhaya kyon nahin tum ne

agar main qarz tha to phir chukana bhi zaruri tha

main kab tak raaz rakhta dil mein apni bewafai ka

ye baat aa kar tumhein ek din batana bhi zaruri tha

faza mein is tarah uDta rahega mustaqil kab tak

parinde ke liye ek aashiyana bhi zaruri tha