talluqat-e-musalsal bhi taziyane the

ta.alluqāt-e-musalsal bhī tāziyāne the

vo dhāge TuuT ga.e jo bahut purāne the

tire milan se tirā intizār behtar thā

bane na jism jo saa.e vahī suhāne the

sinā.eñ lafzoñ kī sab sat.h-e-sang par TūTīñ

tumheñ ye vaar to phūloñ pe āzmāne the

hamāre baa'd bhī raunaq na aa.ī us ghar par

charāġh ek havā ko ka.ī bujhāne the

bachā na koī musāfir bhī darmiyān-e-safar

na jaane kaun se tīroñ ke sab nishāne the

ye bām-o-dar pe jo chamkī thī dhuup sī ai 'aah'

mirī talāsh meñ guzre hue zamāne the

talluqat-e-musalsal bhi taziyane the

wo dhage TuT gae jo bahut purane the

tere milan se tera intizar behtar tha

bane na jism jo sae wahi suhane the

sinaen lafzon ki sab sath-e-sang par TuTin

tumhein ye war to phulon pe aazmane the

hamare ba'd bhi raunaq na aai us ghar par

charagh ek hawa ko kai bujhane the

bacha na koi musafir bhi darmiyan-e-safar

na jaane kaun se tiron ke sab nishane the

ye baam-o-dar pe jo chamki thi dhup si ai 'ah'

meri talash mein guzre hue zamane the