talluqat ka ek ye bhi shaKHsana hua

ta.alluqāt kā ik ye bhī shāḳhsāna huā

hadaf meñ us kā banā jis se dostāna huā

kasīdagī-e-marāsim se mutma.in huuñ bahut

fasurda-ḳhātirī-e-yār to bahāna huā

ab us se rasm-o-rah-e-dostī nahīñ mumkin

ye ek faisla honā thā vālihāna huā

mire ḳhudā ne talab se mujhe ziyāda diyā

mirā nasīb na maharūm-e-āb-o-dāna huā

duā-e-ḳhair ki ab bijliyoñ kī zad meñ hai

mirā qafas huā yā terā āshiyāna huā

kuchh us kā husn thā kuchh zevaroñ kī zebā.ish

ye ḳhvāb thā use dekhe hue zamāna huā

ye dil ki jis meñ haiñ madfūn saiñkaḌoñ yādeñ

navādirāt kā 'mohsin' koī ḳhazāna huā

talluqat ka ek ye bhi shaKHsana hua

hadaf mein us ka bana jis se dostana hua

kasidagi-e-marasim se mutmain hun bahut

fasurda-KHatiri-e-yar to bahana hua

ab us se rasm-o-rah-e-dosti nahin mumkin

ye ek faisla hona tha walihana hua

mere KHuda ne talab se mujhe ziyaada diya

mera nasib na maharum-e-ab-o-dana hua

dua-e-KHair ki ab bijliyon ki zad mein hai

mera qafas hua ya tera aashiyana hua

kuchh us ka husn tha kuchh zewaron ki zebaish

ye KHwab tha use dekhe hue zamana hua

ye dil ki jis mein hain madfun sainkaDon yaaden

nawadiraat ka 'mohsin' koi KHazana hua