talluqat mein itna sa ehtimam to rakh

ta.alluqāt meñ itnā sā ehtimām to rakh

na kar tū mujh se mohabbat duā salām to rakh

batā.ūñ kaise tire hijr meñ kaTe mire din

tū ek shab mire ghar meñ kabhī qiyām to rakh

mirī safā.ī meñ bhī shīr-ḳhvār boleñge

tū ai zuleḳhā mahal meñ mujhe ġhulām to rakh

talāsh kaise karūñgā añdhere meñ tirā ghar

jalā ke baam pe koī charāġh-e-shām to rakh

hai kitnā mai se ta.alluq mirā batātā huuñ

surāhī rakh mire aage tū pahle jaam to rakh

suḳhan-shanās biThā.eñge sar pe 'gīlānī'

tū un ke sāmne apnā koī kalām to rakh

talluqat mein itna sa ehtimam to rakh

na kar tu mujh se mohabbat dua salam to rakh

bataun kaise tere hijr mein kaTe mere din

tu ek shab mere ghar mein kabhi qiyam to rakh

meri safai mein bhi shir-KHwar bolenge

tu ai zuleKHa mahal mein mujhe ghulam to rakh

talash kaise karunga andhere mein tera ghar

jala ke baam pe koi charagh-e-sham to rakh

hai kitna mai se talluq mera batata hun

surahi rakh mere aage tu pahle jam to rakh

suKHan-shanas biThaenge sar pe 'gilani'

tu un ke samne apna koi kalam to rakh