تعلقات میں یخ بستگی پڑی رہے گی

تعلقات میں یخ بستگی پڑی رہے گی

کہیں غبار کہیں دھند سی پڑی رہے گی

وہ آئے گا اسے دیکھیں گے دیکھتے رہیں گے

کتاب ایسے کھلی کی کھلی پڑی رہے گی

پڑا رہے گا کوئی خواب ایک پھول کے ساتھ

اور اس کے ساتھ اک تصویر بھی پڑی رہے گی

کچھ احتیاط تعلق اب اس مقام پہ ہے

کہ دل میں جو بھی گرہ پڑ گئی پڑی رہے گی

یہ برف اب کے برس بھی اگر نہیں پگھلی

ہمارے بیچ پڑی خامشی پڑی رہے گی

درون ذات پہ اڑتی رہے گی گرد ملال

دلوں کی ڈور یوں الجھی ہوئی پڑی رہے گی

شکن پڑی ہے جبیں پر تو نوچ ڈال اسے

وگرنہ دیر تلک یہ پڑی پڑی رہے گی

ہمیں نہ ہوں گے اگر کل تو حسن داد طلب

چمک دمک یہ تری دل کشی پڑی رہے گی

چلا بھی جائے گا اٹھ کر تو میرے بستر پر

شکن شکن مری افسردگی پڑی رہے گی

پڑے رہیں گے ترے در پہ خستہ جاں تیرے

ہمارے باد بھی درماندگی پڑی رہے گی