talluqat mein yaKH-bastagi paDi rahegi

ta.alluqāt meñ yaḳh-bastagī paḌī rahegī

kahīñ ġhubār kahīñ dhund sī paḌī rahegī

vo aa.egā use dekheñge dekhte raheñge

kitāb aise khulī kī khulī paḌī rahegī

paḌā rahegā koī ḳhvāb ek phuul ke saath

aur is ke saath ik tasvīr bhī paḌī rahegī

kuchh ehtiyāt-e-ta.alluq ab is maqām pe hai

ki dil meñ jo bhī girah paḌ ga.ī paḌī rahegī

ye barf ab ke baras bhī agar nahīñ pighlī

hamāre biich paḌī ḳhāmushī paḌī rahegī

darūn-e-zāt pe uḌtī rahegī gard-e-malāl

diloñ kī Dor yuuñ uljhī huī paḌī rahegī

shikan paḌī hai jabīñ par to noch Daal ise

vagarna der talak ye paḌī paḌī rahegī

hamīñ na hoñge agar kal to husn-e-dād-talab

chamak-damak ye tirī dilkashī paḌī rahegī

chalā bhī jā.egā uTh kar tū mere bistar par

shikan shikan mirī afsurdagī paḌī rahegī

paḌe raheñge tire dar pe ḳhasta-jāñ tere

hamāre baad bhī darmāndagī paḌī rahegī

talluqat mein yaKH-bastagi paDi rahegi

kahin ghubar kahin dhund si paDi rahegi

wo aaega use dekhenge dekhte rahenge

kitab aise khuli ki khuli paDi rahegi

paDa rahega koi KHwab ek phul ke sath

aur is ke sath ek taswir bhi paDi rahegi

kuchh ehtiyat-e-talluq ab is maqam pe hai

ki dil mein jo bhi girah paD gai paDi rahegi

ye barf ab ke baras bhi agar nahin pighli

hamare bich paDi KHamushi paDi rahegi

darun-e-zat pe uDti rahegi gard-e-malal

dilon ki Dor yun uljhi hui paDi rahegi

shikan paDi hai jabin par to noch Dal ise

wagarna der talak ye paDi paDi rahegi

hamin na honge agar kal to husn-e-dad-talab

chamak-damak ye teri dilkashi paDi rahegi

chala bhi jaega uTh kar tu mere bistar par

shikan shikan meri afsurdagi paDi rahegi

paDe rahenge tere dar pe KHasta-jaan tere

hamare baad bhi darmandagi paDi rahegi