Talne se waqt kya Talta raha

Tālne se vaqt kyā Taltā rahā

āstīñ meñ saañp ik paltā rahā

maut bhī letī rahī apnā ḳhirāj

kārobār-e-zīst bhī chaltā rahā

koī to sāñcha kabhī aa.egā raas

maiñ har ik sāñche meñ yuuñ Dhaltā rahā

shahr ke saare mahal mahfūz the

terā merā āshiyāñ jaltā rahā

zindagī meñ aur sab kuchh thā hasīñ

apnā honā hī mujhe khaltā rahā

bujh ga.e tahzīb-e-nau ke sab charāġh

ek miTTī kā diyā jaltā rahā

ārzūeñ ḳhaak meñ miltī rahīñ

naḳhl-e-ulfat phūltā phaltā rahā

ban ke sone kā hiran terā vajūd

mere mahsūsāt ko chhaltā rahā

raat bhar suunī rahī birhan kī sej

aur āñgan meñ diyā jaltā rahā

zikr-e-haq bhī thā bajā 'sāhir' magar

mai-kashī kā daur bhī chaltā rahā

Talne se waqt kya Talta raha

aastin mein sanp ek palta raha

maut bhi leti rahi apna KHiraj

karobar-e-zist bhi chalta raha

koi to sancha kabhi aaega ras

main har ek sanche mein yun Dhalta raha

shahr ke sare mahal mahfuz the

tera mera aashiyan jalta raha

zindagi mein aur sab kuchh tha hasin

apna hona hi mujhe khalta raha

bujh gae tahzib-e-nau ke sab charagh

ek miTTi ka diya jalta raha

aarzuen KHak mein milti rahin

naKHl-e-ulfat phulta phalta raha

ban ke sone ka hiran tera wajud

mere mahsusat ko chhalta raha

raat bhar suni rahi birhan ki sej

aur aangan mein diya jalta raha

zikr-e-haq bhi tha baja 'sahir' magar

mai-kashi ka daur bhi chalta raha