taq-e-jaan mein tere hijr ke rog sambhaal diye

tāq-e-jāñ meñ tere hijr ke rog sambhāl diye

us ke baad jo ġham aa.e phir hañs ke Taal diye

kab tak aaḌ banā.e rakhtī apne hāthoñ ko

kab tak jalte tez havāoñ meñ behāl diye

vahī muqābil bhī thā merā sañg-e-rāh bhī thā

jis patthar ko maiñ ne apne ḳhadd-o-ḳhāl diye

zard rutoñ kī gard ne haal chhupāyā thā ghar kā

ik bārish ne dīvāroñ ke zaḳhm ujaal diye

dhaat kharī thī jazboñ kī lekin ujrat se qabl

qismat kī Taksāl ne sikke khoTe Dhaal diye

taaza rut ke istiqbāl kī ḳhātir shāḳhoñ ne

peḌ ke saare mausam-dīda-pāt uchhāl diye

jin ko paḌh kar pahle hañstī thī phir rotī thī

āḳhir ik din maiñ ne vo ḳhat aag meñ Daal diye

jin meñ the mazkūr havāle terī chāhat ke

'nūr' kitāb-e-zīst se vo aurāq nikāl diye

taq-e-jaan mein tere hijr ke rog sambhaal diye

us ke baad jo gham aae phir hans ke Tal diye

kab tak aaD banae rakhti apne hathon ko

kab tak jalte tez hawaon mein behaal diye

wahi muqabil bhi tha mera sang-e-rah bhi tha

jis patthar ko main ne apne KHadd-o-KHal diye

zard ruton ki gard ne haal chhupaya tha ghar ka

ek barish ne diwaron ke zaKHm ujal diye

dhat khari thi jazbon ki lekin ujrat se qabl

qismat ki Taksal ne sikke khoTe Dhaal diye

taza rut ke istiqbaal ki KHatir shaKHon ne

peD ke sare mausam-dida-pat uchhaal diye

jin ko paDh kar pahle hansti thi phir roti thi

aaKHir ek din main ne wo KHat aag mein Dal diye

jin mein the mazkur hawale teri chahat ke

'nur' kitab-e-zist se wo auraq nikal diye