طاق نسیاں سے پرانا سا دیا لے آئے

طاق نسیاں سے پرانا سا دیا لے آئے

قافلے وقت کے آئے تو اجالے آئے

اک معما ہی رہی پھر بھی حقیقت اس کی

چلتے چلتے قدم فکر میں چھالے آئے

اس کی گلیوں میں ہے کچھ ایسی کشش ایسا جمال

ماہ شب تاب بھی دستار سنبھالے آئے

تجھ کو دیکھا ہی نہیں موج بہاراں نے کبھی

پھر کہاں سے وہ تری طرز ادا لے آئے

خیمۂ جاں کی طنابیں ہیں بہت بوسیدہ

کوئی طوفان نہ اس سمت ہوا لے آئے

نوک نیزہ کے حوالے تو کیا سر ہم نے

کوئے قاتل سے مگر ہاتھ بچا لے آئے

نورؔ وہ دشت مسافت بھی عجب تھا کل رات

جستجو میں مری خوابوں کے رسالے آئے