tar-tar-e-pairahan mein bhar gai hai bu-e-dost

tār-tār-e-pairahan meñ bhar ga.ī hai bū-e-dost

misl-e-tasvīr-e-nihālī maiñ huuñ ham-pahlū-e-dost

chehra-e-rañgīñ koī dīvān-e-rañgīñ hai magar

husn-e-matl.a haiñ masīñ matl.a hai saaf abrū-e-dost

hijr kī shab ho chukī roz-e-qayāmat se darāz

dosh se nīche nahīñ utre abhī gesū-e-dost

duur kar dil kī kudūrat mahv ho dīdār kā

aa.ine ko siina saafī ne dikhāyā rū-e-dost

vāh-re shāne kī qismat kis ko ye ma.alūm thā

panja-e-shal se khuleñge uqda-hā-e-mū-e-dost

dāġh-e-dil par ḳhair guzrī to ġhanīmat jāniye

dushman-e-jāñ haiñ jo āñkheñ dekhtī haiñ sū-e-dost

do mareñge zaḳhm-e-kārī se to hasrat se hazār

chaar talvāroñ meñ shal ho jā.egā bāzū-e-dost

farsh-e-gul bistar thā apnā ḳhaak par sote haiñ ab

ḳhisht zer-e-sar nahīñ yā takiya thā zānū-e-dost

yaad kar ke apnī barbādī ko ro dete haiñ ham

jab uḌātī hai havā-e-tund ḳhāk-e-kū-e-dost

us balā-e-jāñ se 'ātish' dekhiye kyūñkar bane

dil sivā shīshe se nāzuk dil se nāzuk ḳhū-e-dost

tar-tar-e-pairahan mein bhar gai hai bu-e-dost

misl-e-taswir-e-nihaali main hun ham-pahlu-e-dost

chehra-e-rangin koi diwan-e-rangin hai magar

husn-e-matla hain masin matla hai saf abru-e-dost

hijr ki shab ho chuki roz-e-qayamat se daraaz

dosh se niche nahin utre abhi gesu-e-dost

dur kar dil ki kudurat mahw ho didar ka

aaine ko sina safi ne dikhaya ru-e-dost

wah-re shane ki qismat kis ko ye malum tha

panja-e-shal se khulenge uqda-ha-e-mu-e-dost

dagh-e-dil par KHair guzri to ghanimat jaaniye

dushman-e-jaan hain jo aankhen dekhti hain su-e-dost

do marenge zaKHm-e-kari se to hasrat se hazar

chaar talwaron mein shal ho jaega bazu-e-dost

farsh-e-gul bistar tha apna KHak par sote hain ab

KHisht zer-e-sar nahin ya takiya tha zanu-e-dost

yaad kar ke apni barbaadi ko ro dete hain hum

jab uDati hai hawa-e-tund KHak-e-ku-e-dost

us bala-e-jaan se 'atish' dekhiye kyunkar bane

dil siwa shishe se nazuk dil se nazuk KHu-e-dost