تارا اوجھل ہو جاتا ہے

تارا اوجھل ہو جاتا ہے

خواب مکمل ہو جاتا ہے

لڑکی آتی ہے ساحل پر

دریا پاگل ہو جاتا ہے

رنگ بدن میں آ جاتے ہیں

چہرہ جل تھل ہو جاتا ہے

اکثر تو آدھے ہی دن میں

باغ مقفل ہو جاتا ہے

دس راتوں کے چلے میں ہی

چاند مکمل ہو جاتا ہے

چودھویں شب تک آتے آتے

لڑکا پاگل ہو جاتا ہے

نیند اگر ہڑتال کرے تو

خواب معطل ہو جاتا ہے

کھڑکی کا وہ بھاری پردہ

ہجر میں ململ ہو جاتا ہے

ہو جاتا ہے عشق ہمیں بھی

اور مسلسل ہو جاتا ہے