tariKH ki jawan umidon ke ru-baru

tārīḳh kī javān umīdoñ ke rū-barū

jalte rahe bahār ke aivān-e-rang-o-bū

tū hī to hai ki ab mujhe pahchāntā nahīñ

hālāñki mere dil meñ dhaḌaktā rahā hai tū

ab zindagī ke naam pe yuuñ chauñktā huuñ maiñ

jaise nayā ḳhayāl hai mauzū-e-guftugū

kal do-ghaḌī guzār ke zulfoñ kī chhāñv meñ

maiñ aaj dar-ba-dar huuñ mirā zikr kū-ba-kū

jo zahr hai salīb hai ḳhanjar kī pyaas hai

vo ḳhvāb le chalā huuñ zamāne ke rū-barū

raas aa gayā hai vaqt ke zaḳhmoñ kā rāsta

kyā kījiye hasīn sitāroñ kī justujū

ye mai-kade kī shaam bhī kitnī udaas hai

ahbāb kā ḳhulūs na rindoñ kī hāo-hū

phir dil ke ās-pās koī sham’ to jale

phir maañg lo kisī se koī zaḳhm-e-ārzū

ye bhī durust hai ki tujhe maiñ bhulā chukā

ye bhī ġhalat nahīñ ki mirī zindagī hai tū

shāyad vahīñ se ho ke saverā guzar gayā

bikhre hue paḌe haiñ jahāñ ḳhvāb-e-ārzū

me’yār-e-fan kā qarz chukāne ke vāste

'jāmī' diyā hai maiñ ne shab-o-roz kā lahū

tariKH ki jawan umidon ke ru-baru

jalte rahe bahaar ke aiwan-e-rang-o-bu

tu hi to hai ki ab mujhe pahchanta nahin

haalanki mere dil mein dhaDakta raha hai tu

ab zindagi ke nam pe yun chaunkta hun main

jaise naya KHayal hai mauzu-e-guftugu

kal do-ghaDi guzar ke zulfon ki chhanw mein

main aaj dar-ba-dar hun mera zikr ku-ba-ku

jo zahr hai salib hai KHanjar ki pyas hai

wo KHwab le chala hun zamane ke ru-baru

ras aa gaya hai waqt ke zaKHmon ka rasta

kya kijiye hasin sitaron ki justuju

ye mai-kade ki sham bhi kitni udas hai

ahbab ka KHulus na rindon ki hao-hu

phir dil ke aas-pas koi sham’ to jale

phir mang lo kisi se koi zaKHm-e-arzu

ye bhi durust hai ki tujhe main bhula chuka

ye bhi ghalat nahin ki meri zindagi hai tu

shayad wahin se ho ke sawera guzar gaya

bikhre hue paDe hain jahan KHwab-e-arzu

me’yar-e-fan ka qarz chukane ke waste

'jami' diya hai main ne shab-o-roz ka lahu