tariki mein nur ka manzar suraj mein shab dekhoge

tārīkī meñ nuur kā manzar sūraj meñ shab dekhoge

jis din tum āñkheñ khologe duniyā ko jab dekhoge

dhīre dhīre har jānib sannāTā sā chhā jā.egā

so jā.eñgī rafta rafta āvāzeñ sab dekhoge

khambe saare TuuT chuke haiñ chhappar girne vaalā hai

buniyādoñ par jiine vaalo uupar tum kab dekhoge

shāyad tum bhī mere jaise ho jāoge āñkhoñ se

sahme chehre guñg zabāneñ zard badan jab dekhoge

vo to bāzīgar haiñ un kā maqsad khel dikhānā hai

tum to farzāne ho sāhib kab tak kartab dekhoge

pahle to sarsabz rahoge phir piile paḌ jāoge

jis din tum bhī rañg-nagar meñ surḳh koī lab dekhoge

baiThe baiThe ghar meñ yuuñ hī pal pal ghuT ghuT marnā hai

yā nikaloge ghar āñgan se jiine kā Dhab dekhoge

kal tak jo shaffāf the chehre āvāzoñ se ḳhālī the

āḌī-tirchhī surḳh lakīreñ un par bhī ab dekhoge

khambe to ye gaaḌ chuke haiñ rassī bhī ab tāneñge

ye bhī khel hī khuleñge in ke bhī kartab dekhoge

tariki mein nur ka manzar suraj mein shab dekhoge

jis din tum aankhen khologe duniya ko jab dekhoge

dhire dhire har jaanib sannaTa sa chha jaega

so jaengi rafta rafta aawazen sab dekhoge

khambe sare TuT chuke hain chhappar girne wala hai

buniyaadon par jine walo upar tum kab dekhoge

shayad tum bhi mere jaise ho jaoge aankhon se

sahme chehre gung zabanen zard badan jab dekhoge

wo to bazigar hain un ka maqsad khel dikhana hai

tum to farzane ho sahib kab tak kartab dekhoge

pahle to sarsabz rahoge phir pile paD jaoge

jis din tum bhi rang-nagar mein surKH koi lab dekhoge

baiThe baiThe ghar mein yun hi pal pal ghuT ghuT marna hai

ya nikaloge ghar aangan se jine ka Dhab dekhoge

kal tak jo shaffaf the chehre aawazon se KHali the

aaDi-tirchhi surKH lakiren un par bhi ab dekhoge

khambe to ye gaD chuke hain rassi bhi ab tanenge

ye bhi khel hi khulenge in ke bhi kartab dekhoge